Դոկտոր Ջեյն Գուդալը 2022 սեպտեմբերին Հայաստանում անցկացված միջազգային Սթարմուս VI փառատոնի ընթացքում շնորհվող Սթիվեն Հոքինգի մրցանակին արժանացած չորս գիտնականներից էր։ Սթարմուսի հոգաբարձուների խորհուրդը միաձայն ընտրել էր նրան և հայտարարել մրցանակակրի մասին պաշտոնական արարողության ժամանակ։
Դոկտոր Գուդալը չէր կարողացել անձամբ ներկա գտնվել արարողությանը և նոյեմբերի 29-ին Լոնդոնում Սթարմուս փառատոնի համահիմնադիր Գարիկ Իսրաելյանն անձամբ հանձնեց նրան մրցանակը Թագավորական աշխարհագրական ընկերությունում։
«Էթնոլոգ պրոֆեսորներն ինձ ասում էին, որ ես չեմ կարող խոսել կենդանիների՝ որպես անհատականություն, մտածողություն և էմոցիաներ ունեցող էակների մասին։ Իհարկե ես չէի կարող դա ընդունել»,- դոկտոր Ջեյն Գուդալ։
Դիտեք նրա ոգեշնչող ելույթը, որը հեռարձակվեց փառատոնի ընթացքում գլխավոր բեմից և հուզեց շատերին։
Սեպտեմբերի 6-ին Starmus VI Armenia միջազգային գիտության վեցերորդ փառատոնի ընթացքում Ջեյն Գուդալին շնորհվեց Սթիվեն Հոքինգի մրցանակը, որ տրվում է գիտության կոմունիկացիայի, հանրայնացման գործում ունեցած ավանդի համար։ Նոմինացիան ներկայացվել էր Նոբելյան մրցանակակիր, գիտնական և Սթարմուսի հոգաբարձուների խորհրդի անդամ Էմանուել Շարպենտիեյի կողմից։
Դոկտոր Գուդալի աշխատանքները ոգեշնչել են գիտնականների, նատուրալիստների, հետազոտողների և գիտության հաղորդակցությամբ զբաղվողների սերունդների, և նրա պատմությունը խթան է հանդիսացել բազմաթիվ երիտասարդ կին գիտնակաների կայացման և գաղափարների իրականացման գործում։
Սթիվեն Հոքինգի մրցանակը հիմնադրվել է պրոֆեսոր Հոքինգի և Սթարմուս փառատոնի հոգաբարձուների խորհրդի կողմից 2016 թվականին՝ նպատակ ունենալով պարգևատրել գիտության հանրայնացման գործում կատարած լուրջ ներդրումների համար տարբեր ոլորտների գիտնականների։ Մրցանակակիրներն ընտրվել են պրոֆեսոր Հոքինգի և Սթարմուսի խորհրդի կողմից, և այն տրվել է համաշխարհային գիտական մտքի ամենափայլուն ներկայացուցիչներին միավորող փառատոնի՝ Սթարմուսի ընթացքում, որը հիմնադրել են դոկտոր Գարիկ Իսրաելյանն ու դոկտոր Բրայան Մեյը։
