Հայաստանի Ազգային ժողովի արտաքին հարաբերությունների մշտական խորհրդարանական հանձնաժողովն ապրիլի 23-ին բացասական եզրակացություն է տվել «Հայաստանի Հանրապետության և Ադրբեջանի Հանրապետության միջև սահմանազատման և սահմանագծման գործընթացի մասին» Ազգային ժողովի հայտարարության նախագծին, որը պատրաստվել է ընդդիմադիր «Հայաստան» խորհրդարանական խմբակցության կողմից։
Ընդդիմությունը, մասնավորապես, առաջարկել է Ազգային ժողովին՝ որպես ներկայացուցչական մարմնի, ընդունել սկզբունքների մասին հայտարարություններ, որոնց հիման վրա գործադիր իշխանությունը կկարողանա առաջ տանել սահմանազատման և սահմանագծման գործընթացը։
Փաստաթղթի համաձայն, գործընթացը պետք է հիմնված լինի Վիեննայի կոնվենցիայի, Հելսինկյան եզրափակիչ ակտի սկզբունքների, ինչպես նաև 2017 թվականին ԵԱՀԿ քարտուղարության «Պետական սահմանների սահմանազատում և սահմանագծում. հրատապ հարցեր և լուծման ուղիներ» փաստաթղթի շրջանակում ընդունված հայեցակարգային նորմերի վրա։