Նոր Նորքի ոստիկանության բաժանմունքում օրերս ներխուժման փորձ կատարած երեք անձանցից երկուսը, որոնք վիրավորում էին ստացել նռնակի գործարկումից, շարունակում են մնալ բժիշկների հսկողության ներքո:
Այս մասին «Հայկական ժամանակ»-ին հայտնեց առողջապահության նախարարության խոսնակը:
«Մեկի առողջական վիճակը միջին ծանրության է, մյուսինը՝ ծանր, կյանքին սպառնացող վտանգի ռիսկ չկա»,- մանրամասնեց նա:
Հիշեցնենք՝ մարտի 24-ին լարված ու պայթյունավտանգ իրավիճակ էր ստեղծվել ՆԳՆ ոստիկանության Նոր Նորքի բաժնի մոտ, որտեղ հավաքվել էին մի խումբ քաղաքացիներ, հիմնականում՝ «Մարտական եղբայրության» անդամներ, որոնք պահանջում էին, որ ոստիկանները ազատ արձակեն իրենց համակիրներին:
Ոստիկանության շենքի բակում պայթյուն էր տեղի ունեցել, 2 քաղաքացի բեկորային վնասվածքներով տեղափոխվել էր բուժհաստատություն։
Ոստիկանության հաղորդագրության համաձայն՝ նռնակի պայթյունից տուժել էին ներխուժող անձանցից 2-ը, նրանք ունեն ստորին վերջույթների բեկորային վնասվածքներ։
ԱԱԾ հատուկջոկատայիններին և ոստիկաններին հաջողվել էր վնասազերծել և բերման ենթարկել նռնակով զինված անձին:
Քննչական կոմիտեն նոր մանրամասներ է հայտնել դեպքից՝ նշելով, որ կատարված խուզարկություններով ԱԺԲ գրասենյակում հայտնաբերվել են փաստաթղթեր զենք, զինամթերք, պլաններ, սխեմաներ, թմրամիջոցի նմանվող զանգվածներ և այլն: