Սակայն կարճ ժամանակ անց Ալիևը սկսեց հերքել պրահյան պայմանավորվածությունները, քանի որ դա փաստացի արձանագրումն է Հայաստանի տարածքային ամբողջականության։

 

Մեդիամանիպուլյացիայի «զոհ» մեր քաղաքացիներին հավաստիացնում են, թե «Տավուշից գյուղեր են հանձնում»։ Ճիշտ է, բոլոր հնարավոր միջոցներով և դեպքերում հերքում ենք այս կեղծ թեզը, բայց ևս մեկ անգամ ուզում եմ ասել, որ ՀՀ սուվերեն տարածքից ոչ մի քառակուսի չի «հանձնվելու», այլ վերը նշված հռչակագրի հիման վրա Հայաստանն ու Ադրբեջանը առաջին անգամ ունենալու են պետական սահմանի սահմանազատված հատված։

 

Իսկ այսօրվա իրավիճակում, երբ չկա սահմանագծված պետական սահման, մենք փաստացի գտնվում ենք պատերազմի սպառնալիքի տակ։

 

Հիմա կտեսնենք, թե ովքեր են դեմ սահմանազատմանը, այսպիսով՝ ովքեր են փորձում պատերազմի մեջ ներքաշել Հայաստանը»,- գրել է պատգամավորը:

Հիշեցնենք՝ Հայաստանի և Ադրբեջանի սահմանին երեկ տեղի է ունեցել երկու երկրի միջև պետական սահմանի սահմանազատման հարցերով հանձնաժողովների ութերորդ հանդիպումը՝ Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի նախագահությամբ:

Հանդիպման արդյունքում ստորագրվել է արձանագրություն: Կողմերը պայմանավորվել են աշխատանքային կարգով համաձայնեցնել հաջորդ հանդիպման անցկացման ամսաթիվն ու վայրը:

Մեր արտգործնախարարության հաղորդագրության համաձայն՝ հանդիպման արդյունքում նախնական համաձայնություն է ձեռք բերվել սահմանագծի Բաղանիս - Բաղանիս Այրում, Ոսկեպար - Աշաղը Ասկիպարա, Կիրանց - Խեյրումլի և Բերքաբեր - Կըզըլ Հաջիլի հատվածները համապատասխանեցնել Խորհրդային Միության փլուզման պահին գոյություն ունեցող իրավաբանորեն հիմնավորված միջհանրապետական սահմանին: