Հետո պիտի պարզվեր, որ ՀԱՊԿ-ը ոչ թե որպես դաշնակից է ուզում գալ Հայաստանի Հանրապետություն, այլ որպես խաղաղապահ, ինչով փաստացի ՀՀ-ին դուրս է դնում անվտանգային երաշխիքների իր համակարգից։ Այս մասին ԱԺ-ում հայտարարեց վարչապետ Փաշինյանը՝ անդրադառնալով 2021 թվականի ադրբեջանական հարձակմանը․
«Եթե Կառավարությունը այն ժամանակ տուրք տար էմոցիաներին՝ իրադարձությունները կարող էին ընթանալ հետևյալ սցենարով՝ ռազմական գործողությունների ծավալում ՀՀ ինքնիշխան տարածքների խորքում, ԱԺ ընտրությունների չկայացում, ընտրված իշխանության բացակայություն, ՀԱՊԿ ոչ թե դաշնակիցների, այլ խաղաղապահների ծավալում, ապա դրածո իշխանության ձևավորում և ՀՀ պետականության փաստացի լուծարում, բայց Հայաստանի ժողովուրդը կրկին բացառիկ պետականակենտրոնություն ցուցաբերեց և արձագանքեց Կառավարության ու կառավարող մեծամասնության կոչերին»։
Վարչապետը նաև կարևորեց Պրահայում 2022 թվականին ձեռք բերված պայմանավորվածությունները և նշեց, որ Եվրամիության դիտորդական առքելության ներկայությունը կարող է ևս երկու տարի երկարաձգվել։
