ՀՀ Ազգային ժողովը հոկտեմբերի 6-ին շարունակել է հերթական նիստերի աշխատանքը:
Խորհրդարանականները երկրորդ ընթերցմամբ քննարկել են Կառավարության հեղինակած ««Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» ՀՀ օրենքում փոփոխություն եւ լրացում կատարելու մասին» օրենքի նախագիծը, որով առաջարկվել է ընդլայնել պետական պաշտոն եւ պետական ծառայության պաշտոն զբաղեցնող անձանց տրամադրվող սոցփաթեթի ծառայությունների շրջանակը:
Հիմնական զեկուցող, ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանի ներկայացմամբ՝ առաջին ընթերցումից հետո գլխադասային հանձնաժողովում քննարկվել եւ ընդունվել է Կառավարության կողմից առաջարկված խմբագրական լրացումը: Ռուբեն Սարգսյանը նշել է, որ ԱԺ «Հայաստան» խմբակցության կողմից ներկայացված առաջարկությունները չեն ընդունվել:
Հարակից զեկուցող, ԱԺ աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը կոչ է արել կողմ քվեարկել նախագծին:
Պատգամավորները ելույթներում անդրադարձել են սոցիալ-աշխատանքային երաշխիքի գաղափարին, սոցփաթեթի ծառայությունների շրջանակն ընդլայնելու անհրաժեշտությանը:
Եզրափակիչ ելույթում Ռուբեն Սարգսյանը պարզաբանել է ԱԺ «Հայաստան» խմբակցության կողմից ներկայացված առաջարկությունները չընդունելուն վերաբերող հարցերը: Նրա խոսքով՝ փոփոխությունների նպատակը աշխատողների աշխատանքի արդյունավետության բարձրացումն է, իսկ առաջարկվող ուղղությունների փոխհատուցման հարցը կարելի է լուծել այլ մեխանիզմներով ու ծրագրերով:
«Հայաստան» խմբակցության քարտուղար Արծվիկ Մինասյանը տեղեկացրել է, որ խմբակցությունը ձեռնպահ է քվեարկելու նախագծին:
Խորհրդարանը քվեարկություններով ընդունել է քննարկված օրենքների նախագծերը:
«ԱԺ կանոնակարգ» օրենքի համաձայն՝ ՀՀ վարչապետը եւ Կառավարության անդամները պատասխանել են պատգամավորների հարցերին:
