Իրանի պաշտպանության նախարար Մոհամմադ Ռեզա Աշտիանին չորեքշաբթի երեկոյան հանդիպել է այցով Իրանում գտնվող ՀՀ ՊՆ նախարար Սուրեն Պապիկյանի հետ ու հանդիպման ժամանակ ասել է, որ չպետք է թույլ տալ, որպեսզի կովկասյան տարածաշրջանը դառնա մրցակցության դաշտ այլոց համար։
Աշտիանին, ըստ IRNA-ի թղթակցի, պնդել է, որ «տարածաշրջանից դուրս անվտանգության փնտրտուքն հակառակ արդյունքն է տալու, տարածաշրջանը վերածվելու է ուժային հակամարտության վայրի և ավելի շատ մարտահրավերներ է առաջացնելու տարածաշրջանային խաղաղության և կայունության համար»:
Աշտիանին ընդգծել է, որ Իրանը հավատարիմ է սահմանների անփոփոխելիության, կայունության ու անվտանգության քաղաքականությանը կովկասյան տարածաշրջանում, աջակցում է իր երկու հարևանների՝ Ադրբեջանի և Հայաստանի միջև ուղիղ բանակցություններն ու այն համարում է խաղաղության, առաջընթացի և զարգացման հիմք։
