Նիկոլ Փաշինյանի խոսքով՝ խաղաղության օրակարգը ռազմավարություն է:
Հրավիրած ասուլիսի ժամանակ վերջինս պարզաբանեց, թե ինչով է տարբերվում ռազմավարությունը ոչ ռազմավարությունից:
«Տարբերվում է մի բանով․ դու, ի հեճուկս բոլոր հանգամանքների, շարունակում ես շարժվել՝ ուղենիշ օգտագործելով քո ունեցած նպատակը։ Ժողովրդավարությունը մեզ համար ռազմավարությո՞ւն է, բայց հիմա ՀՀ-ում ժողովրդավարությունը իդեալակա՞ն է, իհարկե՝ ոչ, դա նշանակում է, որ մենք, ասենք, դե լավ, դե որ սենց պրոբլեմներ կան, դե եկեք չգնանք ժողովրդավարության հետևից, սրանով է ռազմավարական ընտրությունը այս տիրույթում»,- ասաց նա։
Խոսելով ՀԱՊԿ-ի հետ հարաբերությունների մասին՝ վարչապետը նկատեց․ «Մենք ՀԱՊԿ-ում փաստացիորեն մեր գործունեությունը սառեցրել ենք․ նիստերին չենք մասնակցում, ներկայացուցիչ չունենք։ Մենք խնդրում ենք, պահանջում ենք՝ հարգելի գործընկերները պատասխանեն մի հարցի՝ ո՞րն է ՀԱՊԿ պատասխանատվության գոտին ՀՀ-ում։ Հարցրել ենք, բայց այդ հարցի պատասխանը չենք ստացել։ Այսօր էլ այդ հարցը սեղանին դրված է․ եթե ՀԱՊԿ-ը կպատասխանի այդ հարցին, ու այդ պատասխանը կհամապատասխանի մեր պատկերացումներին, կնշանակի, որ ՀՀ-ի և կազմակերպության միջև հարցերը լուծված են, ամփոփված են։ Եթե՝ ոչ, ապա Հայաստանը դուրս կգա ՀԱՊԿ-ից, բայց չեմ կարող ասել՝ երբ»։
