Մարվեց և շրջանառության մեջ դրվեց նոր նամականիշ՝ նվիրված Հայրենական մեծ պատերազմում տարած հաղթանակի 75-ամյակին: «Արմենպրես»-ի հաղորդմամբ՝ արարողությունը տեղի ունեցավ հունիսի 26-ին «Մայր Հայաստան» ռազմական պատմության թանգարանի բաց տարածքում:

280 ՀՀ դրամ անվանական արժեքով նամականիշը տպագրվել է Ֆրանսիայի «Cartor» տպագրատանը՝ 40 հազար տպաքանակով: Նամականիշի դիզայնի հեղինակն է «Հայփոստ» ՓԲԸ-ի դիզայներ Դավիթ Դովլաթյանը: Նամականիշի մարումն իրականացրին Բարձր տեխնոլոգիական արդյունաբերության նախարարի առաջին տեղակալ Գոռ Մելիքյանը, Պաշտպանության փոխնախարար Մակար Ղամբարյանը, «Հայփոստ» ՓԲԸ գլխավոր տնօրեն Հայկ Կարապետյանը և Հայաստանի ֆիլատելիստների միության նախագահ Հովիկ Մուսայելյանը:

Նամականիշի վրա պատկերած է գնդակոծված պատ, որին ածուխով գրված է «Մտանք Բեռլին» գրառումը: Նամականիշի վերևի աջ անկյունում նկարված է «75» թիվը՝ խորհրդանշելով Հայրենական Մեծ պատերազմում տարած հաղթանակի 75-ամյակը: 1992 թվականից առ այսօր «Հայփոստի» կողմից թողարկվել է Հայրենական մեծ պատերազմի թեմատիկային առնչվող 19 նամականիշ և 3 գեղաթերթիկ:

Աղբյուր՝ Արմենպրես