Հայաստանի Հանրապետությունը միակողմանի զիջումների չի գնում: Այս մասին ասաց ԱԺ նախագահ Ալեն Սիմոնյանը լրագրողների հետ ճեպազրույցին՝ անդրադառնալով ընդդիմադիրների շարժմանը:
«ՀՀ-ն ֆիքսում է իր սահմանը և այդ գործընթացը շարունակվելու է այն քարտեզներով, որոնք ունեն իրավական հիմքեր»,- ասաց նա և նշեց, որ միջազգային նորմերին համապատասխան է արվում ամեն ինչ:
Ինչ վերաբերում է ընդդիմության պահանջներին, ապա նա ասաց, որ այդպես էլ քաղաքական առաջարկ չի լսել ընդդիմությունից:
Ալեն Սիմոնյանն ասաց, որ հաջորդ իշխանությունները կարող են ձևավորվել միայն ընտրությունների միջոցով: Նա վստահություն հայտնեց, որ ՀՀ ժողովուրդը ամեն ինչ շատ լավ հասկանում է:
«Ես վստահ եմ, որ ՀՀ ժողովուրդը վստահում է սահմանազատման և սահմանագծման գործընթացին, գիտի, որ Հայաստանը պետք է խաղաղության մեջ ապրի, պատերազմ չի ուզում, չի պատրաստվում հներին վերադարձնել իշխանությանը, չի պատրաստվում կրոնապետության գնալ, չի պատրաստվում եկեղեցու որոշ անդամներին դիտարկել որպես քաղաքական գործիչ, որն ըստ ինձ անընդունելի է, և հասկանում է, որ եկեղեցին, Աստվածը, հույզերը, այն էմոցիաները, որոնք ունենք որպես քրիստոնյա մարդիկ, և անհատները, որոնք այսօր քաղաքական շահ են սպասարկում, դրանք տարբեր բաներ են և դրա համար ես չեմ հավատում, որ ՀՀ ժողովուրդն իր իմաստնությունը կորցրել է»,- ասաց նա:
