Ուկրաինայի նախագահ Վլադիմիր Զելենսկին լրացրել է ԵՄ անդամակցության թեկնածուի կարգավիճակ ստանալու հարցաթերթիկի երկրորդ մասը և առցանց հանդիպման ժամանակ այն ցույց տվել Եվրոպական հանձնաժողովի (ԵՀ) ղեկավար Ուրսուլա ֆոն դեր Լեյենին։ Այս մասին հայտնում է ՏԱՍՍ-ը։
«Ես առցանց հանդիպում ունեցա Եվրահանձնաժողովի նախագահ Ուրսուլա ֆոն դեր Լեյենի հետ: Ես ցույց տվեցի լրացված հարցաթերթի երկրորդ մասը, որպեսզի Ուկրաինան ստանա Եվրամիության անդամության թեկնածուի կարգավիճակ: Շնորհակալություն մեզ համար այս կարևոր ճանապարհին աջակցության հստակ ազդանշանների համար»,- գրել է նա իր Telegram-ալիքում։
Ուկրաինայի արտգործնախարար Դմիտրի Կուլեբան իր հերթին Twitter-ի իր էջում լուսանկար է հրապարակել Եվրոպայի խորհրդի գլխավոր քարտուղար Մարյա Պեյչինովիչ-Բուրիչի հետ։ Նա ողջունել է նրան Կիևում և բարձր է գնահատել Եվրոպայի խորհրդի և ԵԽԽՎ-ի որոշումները, որոնք ընդունվել են ի պատասխան Ռուսաստանի ռազմական գորողությունների։
Ապրիլի 8-ին Եվրահանձնաժողովի ղեկավարը Ուկրաինայի նախագահ Վլադիմիր Զելենսկիին հարցաշար է փոխանցել, որի լրացումը Եվրահանձնաժողովին թույլ կտա ԵՄ խորհրդին առաջարկել սկսել ԵՄ-ին Ուկրաինայի անդամակցության շուրջ հարցի քննարկումը։ Ապրիլի 18-ին Զելենսկին Կիևում ԵՄ պատվիրակության ղեկավարին էր հանձնել հարցաշարի առաջին լրացված մասը։
Կիևի կարգավիճակի վերաբերյալ որոշումը կկայացվի հունիսին։ Այս մասին գրել է ՏԱՍՍ-ը՝ վկայակոչելով Եվրահանձնաժողովի նախագահ Ուրսուլա ֆոն դեր Լեյենի հայտարարությանը։
«Եվրոպան մտադիր է իր որոշումը կայացնել հունիսին»,- ասել է ֆոն դեր Լեյենը։
Նշվում է, որ երկրին թեկնածուի կարգավիճակ տալուց հետո սկսվում է ԵՄ-ին երկրի անդամակցության պայմանների շուրջ բանակցությունների գործընթացը։
Եվրահանձնաժողովի կայքում հրապարակված Flash Eurobarometer-ի վերջին հարցումը ցույց է տվել, որ ԵՄ քաղաքացիների ավելի քան 65%-ը կարծում է, որ Ուկրաինան պետք է միանա ԵՄ-ին, երբ պատրաստ լինի դրան։ Կիևի՝ ԵՄ-ին անդամակցելու ամենաշատ կողմնակիցները նկատվում են Պորտուգալիայում՝ 87%, և ամենաքիչը Հունգարիայում՝ 47%։ Ուկրաինայի մուտքի դեմ ամենաշատ հակառակորդները Լյուքսեմբուրգում են` 38% և Հունաստանում` 37%: Ընդհանուր առմամբ, ասոցիացիայի բոլոր երկրներում, բացառությամբ Հունգարիայի, Կիևի եվրաինտեգրման կողմնակիցների թիվը գերազանցում է 50%-ը։
Միաժամանակ, Լեհաստանում Ուկրաինայի դեսպան Անդրեյ Դեշչիցան կարծիք է հայտնել, որ Ուկրաինան մոտ ապագայում ԵՄ անդամ չի դառնա: