Ռուսաստանի նախագահ Վլադիմիր Պուտինը երկուշաբթի օրը Ռուսաստանի Դաշնության Անվտանգության խորհրդի նիստում հայտարարել է, որ մտադիր է լսել ինքնահռչակ Դոնեցկի և Լուգանսկի ժողովրդական հանրապետությունների ղեկավարների դիմումների, ինչպես նաև Պետդումայի՝ այդ սուբյեկտների անկախությունը ճանաչելու վերաբերյալ Անվտանգության խորհրդի անդամների կարծիքը։ Այս մասին հայտնում է ՏԱՍՍ-ը:
«Մեր այսօրվա հանդիպման նպատակն է լսել մեր գործընկերներին և որոշել մեր հետագա քայլերն այս ուղղությամբ, ես նկատի ունեմ ինչպես Դոնեցկի Ժողովրդական Հանրապետության, այնպես էլ Լուգանսկի Ժողովրդական Հանրապետության ղեկավարների դիմումը Ռուսաստանին՝ իրենց ինքնիշխանությունը ճանաչելու խնդրանքով և Ռուսաստանի Դաշնության Պետդումայի որոշումը այս նույն թեմայով՝ կոչ անելով պետության ղեկավարին դա անել և ճանաչել Դոնեցկի Ժողովրդական Հանրապետության և Լուգանսկի Ժողովրդական Հանրապետության անկախությունն ու ինքնիշխանությունը», - ասել է Պուտինը։
Ռուսաստանը սկզբում ամեն ինչ արեց Կիևի և Դոնբասի միջև հակասությունները խաղաղ ճանապարհով լուծելու համար, ասել է նախագահը։ Իրադարձությունների ընթացքը ցույց է տալիս, որ Ուկրաինայի ներկայիս իշխանությունները չեն պատրաստվում իրականացնել մինսկյան պայմանավորվածությունները, ասել է Պուտինը։