Այսօր ՀՀ Ազգային ժողովում «Քաղաքացիական պայմանագիր» խմբակցության պատգամավոր Արփինե Դավոյանը ՀՀ նախագահի թեկնածու Վահագն Խաչատուրյանից հետաքրքրվեց, թե ինչպե՞ս է գնահատում ընդդիմության վարքագիծը, այսինքն՝ այն, որ նրանք բացակայում են նախագահի ընտրության հարցի քննարկումից:
Պատասխանելով հարցին՝ Խաչատուրյանն ասաց, որ դա քաղաքական դիրքորոշում է:
«Այդ տրամաբանությամբ եմ առաջնորդվում, քանի որ անկուսակցական եմ, քաղաքական գնահատականների դաշտ չպետք է մտնեմ: Քաղաքական իրենց այս քայլով գուցե փորձ է իշխանությանը ոչ լեգիտիմացնելու խնդիր դնել: Բայց մի կարևոր բան կա. Ազգային ժողովին ընտրել է ժողովուրդը: Սահմանադրության մեջ գրված է, որ իշխանությունը ձևավորում է ժողովուրդը: Տարբեր ցանկություններով, տարբեր իմիտացիաներով փորձ է արվում այլ կերպ ներկայացնել իշխանությանը, բայց դա որևէ նշանակություն չունի, որովհետև կա ընտրված իշխանություն»,- ասաց Խաչատուրյանը:
Նրա խոսքով՝ քաղաքական կատեգորիաներով կա մեծամասնություն, որոշումները կայացնում է մեծամասնությունը, իսկ փոքրամասնությունը պետք է ենթարկվի մեծամասնության որոշումների կայացմանը:
«Չենթարկվելու ձևերից մեկը համարենք բացակայությունը: Սա ավելի կհեշտացնի մեր պահվածքը, խոսքը, բայց դա չի նշանակում, որ ես պատրաստ չեմ լինելու իրենց հետ հանդիպելու: Նախագահական ինստիտուտն այն հարթակն է, որտեղ պետք է երկխոսություն տեղի ունենա, և այդ երկխոսությունը որևէ մեկին պիտի առավելություն չտա»,- կարծում է Խաչատուրյանը: