Հ ԱԳՆ-ում Ուկրաինայի գործերի ժամանակավոր հավատարմատարին տեղեկացրել են, որ Հայաստանը ռուս-ուկրաինական հակամարտության հարցում չեզոքություն է պահպանում և կողմ է հանդես գալիս հակամարտության խաղաղ հանգուցալուծմանը: Այդ մասին Դենիս Ավտոնոմովը հայտնեց «Արմենպրես»-ի թղթակցին Ուկրաինայի դեսպանատանը մարտի 17-ին հրավիրված մամուլի ասուլիսի ժամանակ:
Հայաստանում Ուկրաինայի գործերի ժամանակավոր հավատարմատարը նաև ողջունեց ՄԱԿ-ի Գլխավոր վեհաժողովում Ուկրաինայի հարցով Հայաստանի Հանրապետության քվեարկությունը:
Մարտի 2-ին ՄԱԿ-ի գլխավոր ասամբլեան ընդունել էր բանաձև, որով պահանջում էր Ռուսաստանից դադարեցնել ռազմական գործողությունները Ուկրաինայում և դուրս բերել իր զորքերը այդ երկրի տարածքից: ՄԱԿ-ի 193 անդամ պետություններից 141-ը կողմ է քվեարկել բանաձևին, 5-ը դեմ, 35-ը ձեռնպահ։ Հայաստանը ձեռնպահ քվեարկողների թվում է։ Գլխավոր ասամբլեայի բանաձևը չունի պարտադիր իրավական ուժ։
Փետրվարի 28-ին ՄԱԿ-ի Մարդու իրավունքների խորհուրդը որոշում էր ընդունել Ուկրաինայի իրավիճակի վերաբերյալ հրատապ քննարկումներ անցկացնելու մասին: Քվեարկությանը մասնակցած երկրներից 29-ը կողմ էին արտահայտվել, 13-ը՝ ձեռնպահ, 5-ը՝ դեմ: Այդ քվեարկության ժամանակ Հայաստանը ևս ձեռնպահ արտահայտվողների թվում էր:
