«Դիմադրություն» շարժումն այսօր առավոտյան վերսկսել է անհնազանդության ակցիաները: Նախապես հայտարարվածի պես` ընդդիմադիրներն այսօր ավտոերթեր են իրականացնում Երևանում: Ավտոերթերն իրականացվում են հետևյալ ուղղություններով՝ Աշտարակի, Արտաշատի, Արգավանդի, Արինբերդի խճուղիներով և Երևան-Աբովյան մայրուղիով:
Աշտարակի խճուղուց մեկնարկած ավտոերթի ճանապարհը փակել էին ոստիկանության աշխատակիցները: Ավտոերթի մասնակիցնեի և ոստիկանության միջև վիճաբանություն տեղի ունեցավ, ինչից հետո ավտոերթի մասնակիցները փակեցին հանդիպակաց երթևեկությունը: Որոշ ժամանակ անց ճանապարհը բացվեց եւ ավտոերթը շարունակվեց:
Հիշեցնենք, որ շաբաթ և կիրակի անհնազանդության ակցիաներ մայրաքաղաքում տեղի չեն ունեցել, սակայն երեկ երեկոյան հերթական հանրահավաքն էր կազմակերպվել: Հիշեցնենք նաև, որ մայիսի 2-ից վարչապետ Նիկոլ Փաշինյանի հրաժարականի պահանջով անհնազանդության ակցիաներ են սկսվել Երևանում, խորհրդարանական ընդդիմության նախաձեռնած շարժումը ակցիաներին զուգահեռ նստացույց է հայտարարել Ֆրանսիայի հրապարակում:
