Կառավարության ծրագիրը Ազգային Ժողովի լիագումար նիստում ներկայացվեց երեկ. հիմնական զեկուցողը վարչապետ Նիկոլ Փաշինյանն է: Վարչապետը պատասխանեց նաև պատգամավորների հարցերին: Այսօր խորհրդարանում շարունակվում է կառավարության ծրագրի քննարկումը:
Ազգային ժողովում կառավարության ծրագրի քննարկման ժամանակ հերթական տհաճ միջադեպը գրանցվեց: «Քաղաքացիական պայմանագիր» խմբակցության պատգամավոր Հայկ Սարգսյանի ելույթի ժամանակ նրա վրա դահլիճից շիշ շպրտեցին, երբ Հայկ Սարգսյանը հայտարարեց, որ բոլոր պաշտպանության նախարարները, որոնց ժամանակ փողով կամ զանգով բանակից մարդ է ազատվել, հայրենիքի դավաճան են: Իրավիճակը լարվեց, ԱԺ նախագահ Ալեն Սիմոնյանը անվտանգության աշխատակիցներին հրավիրեց դահլիճ և ընդմիջում հայտարարեց:
«Քաղաքացիական պայմանագիր» խմբակցության պատգամավոր Հրաչյա Հակոբյանի պնդմամբ`«Հայաստան» խմբակցության ղեկավար Սեյրան Օհանյանն է շիշ նետել ՔՊ պատգամավոր Հայկ Սարգսյանի ուղղությամբ:
«Հայկ Սարգսյանը ելույթ ունենալիս ասաց հետևյալ նախադասությունը` այն պաշտպանության նախարարները, որոնց ժամանակ փողով, զանգով պարտադիր ծառայությունից զինակոչիկները ազատվել են,այդ պաշտպանության նախարարները պետական դավաճան են: Սեյրան Օհանյանը շիշը վերցրեց և շպրտեց Հայկ Սարգսյանի ուղղությամբ»,- լրագրողների հետ զրույցում ասաց Հրաչյա Հակոբյանը:
«Հայաստան» խմբակցության ղեկավար Սեյրան Օհանյանը մեկնաբանել է խորհրդարանի նիստերի դահլիճում տեղի ունեցած միջադեպը, երբ դահլիճից շիշ նետեցին ամբիոնի մոտ ելույթ ունեցող «Քաղաքացական պայմանագիր» խմբակցության պատգամավոր Հայկ Սարգսյանի ուղղությամբ: Օհանյանը պնդում է, որ իշխանությունն է սադրել, որպեսզի բախում տեղի ունենա:
«Իշխանությունն ինքն իր ելույթով սադրեց, որպեսզի բախում տեղի ունենա»,- լրագրողների հետ զրույցում ասաց Օհանյանը: Լրագրողի հարցին, թե արդյոք վիրավորանք կար պատգամավոր Հայկ Սարգսյանի ելույթում, Օհանյանը պատասխանեց, որ պարզապես սադրանք է տեղի ունեցել: Ըստ Օհանյանի՝ խորհրդարանում ծեծկռտուք տեղի չի ունեցել, եղել է բախում, հրմշտոցներ։
