ՀՀ ԱԺ ֆինանսավարկային եւ բյուջետային ու տնտեսական հարցերի մշտական հանձնաժողովները` Գեւորգ Պապոյանի եւ Բաբկեն Թունյանի նախագահությամբ, դեկտեմբերի 24-ին հրավիրած համատեղ նիստում քննարկել են Հաշվեքննիչ պալատի կողմից ՀՀ էկոնոմիկայի նախարարությունում 2021 թվականի պետական բյուջեի առաջին կիսամյակի կատարման հաշվեքննության վերաբերյալ ընթացիկ եզրակացությունը:

ՀՀ հաշվեքննիչ պալատի 3-րդ վարչության պետ Հակոբ Միհրանյանը նշել է, որ գյուղատնտեսական կենդանիների պատվաստման ոլորտում առկա են անհամապատասխանություններ` կապված «ծաղիկ» եւ «դաբաղ» տեսակի պատվաստանյութերի ձեռքբերման գնի հետ, որը գերազանցել է գնման հայտով սահմանված ֆինանսական միջոցները:

2021 թվականի հուլիսի 1-ի դրությամբ «դաբաղ» տեսակի պատվաստանյութի գծով 326.087 հատ պակաս միջոցառում է իրականացվել: Մեկ անձից գնման հետեւանքով հաշվետու ժամանակաշրջանում նախարարությանը մատակարարված ապրանքի գինը գերազանցել է արտադրող կազմակերպության վաճառքի գինը, որը կազմել է շուրջ 63 մլն ՀՀ դրամ:

Բանախոսի հավաստմամբ` անհամապատասխանություններ են արձանագրվել նաեւ գյուղատնտեսության ոլորտում իրականացված մի քանի այլ ծրագրերում ու միջոցառումներում եւս:

ՀՊ-ի կողմից ուսումնասիրվել է նաեւ կորոնավիրուսի տնտեսական հետեւանքների չեզոքացման նպատակով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում` 1.249.486 հազար ՀՀ դրամի չափով:

Նշվել է, որ էկոնոմիկայի ոլորտում պետական քաղաքականության մշակման, ծրագրերի համակարգման եւ մոնիթորինգի ոլորտում առկա է խեղաթյուրում` կապված նախարարության կողմից տրված պարգեւավճարների, ինչպես նաեւ հսկողության գործընթացի թերացում` կապված թափուր հաստիքների հետ, մասնավորապես, քաղաքացիական ծառայության պաշտոնը թափուր մնալուց հետո երեք ամսվա ընթացքում պետք է հայտարարվեր մրցույթ, ինչը չի արվել:

Այլ անհամապատասխանություններ եւս եղել են, որոնց մասին մանրամասն ներկայացված է 57 էջից բաղկացած եզրակացության մեջ:

Հարակից զեկուցող ՀՀ էկոնոմիկայի նախարարի տեղակալ Տիգրան Գաբրիելյանը պարզաբանել է մեկ անձից գնման հետ կապված հարցերը՝ նշելով. «Եթե շուրջ 300 հազար պատվաստում չիրականացվեր, ապա ողջ երկրում դաբաղի համավարակի բռնկման առջեւ կկանգնեինք: Իսկ կորոնովիրուսի տնտեսական հետեւանքների վերացման համար տրամադրված վարկերի տոկոսադրույքների սուբսիդավորման ծրագրի շրջանակներում ֆինանսական միջոցներն օգտագործվել են նպատակային»:

Բանախոսները պատասխանել են պատգամավորների հարցերին:

Եզրափակելով` Գեւորգ Պապոյանը նշել է, որ քննարկումն օգտակար էր բոլորի համար: