Շատ կարևոր է, որ օր առաջ շահագրգիռ քննարկում կազմակերպենք պարետատան, առողջապահության, էկոնոմիկայի նախարարության, Զբոսաշրջության կոմիտեի ու մասնավոր հատվածի ներկայացուցիչների մասնակցությամբ: Այդ մասին «Առաջին լրատվական»-ի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը:
«Պետք է միասին քննարկել սահմանը բացելու հնարավորությունը: Մենք չենք ասում՝ անպայման բացենք: Մենք ասում ենք՝ առաջին հերթին քննարկենք բացման անհրաժեշտությունն ու հնարավորությունը: Գուցե առողջապահության ոլորտն այնպիսի արգումենտներ կբերի, որ մենք հենց առաջինը կասենք՝ հանկարծ սահմանները չբացեք: Բայց և կարող է հակառակը լինի, որ տուրիզմի ոլորտն այն արգումենտները բերի, որ նստենք, ծանրութեթև անենք, գնահատենք սահմանը բացելու կամ չբացելու գինը, տնտեսական, առողջապահական ու անվտանգության առումով:
Գուցե բոլորս գալիս ենք այն եզրահանգմանը, որ ավելի ճիշտ կլինի բացել սահմանները՝ ունենալով դրա կարգավորման բոլոր կանոնակարգերը, ուղեցույցները: Այդ դեպքում մենք տնտեսապես ավելի մեծ հնարավորություններ կունենանք անվտանգության հարցերը կազմակերպելու, տնտեսական վերականգնման հարցերը լուծելու համար»,- մտահոգություն հայտնեց Մեխակ Ապրեսյանը:
Զբոսաշրջային սեզոնին ընդառաջ աշխարհում բոլոր երկրները կամաց-կամաց բացում են իրենց սահմանները զբոսաշրջիկների համար՝ պահպանելով ու սահմանելով անվտանգության նոր կանոններ, որոնք համահունչ են ստեղծված իրավիճակին: Օրինակ՝ եվրոպական երկրները իրենց սահմանները բացել են դեռևս միայն ԵՄ անդամ պետությունների քաղաքացիների համար: Իսպանիան, Հունաստանը իրենց սահմանները բացել են բացառապես եվրոպական երկրների քաղաքացիների համար՝ սահմանելով բազմաշերտ անվտանգության կանոններ: Օրինակ՝ Վրաստանը, Դուբայը հստակ չափորոշիչներ են սահմանել, թե որ երկրներից կարող են իրենց երկիր մուտք գործել:
Եգիպտոսը իր սահմանները բացել է բոլորի համար, այդ թվում՝ Հայաստանի: Սակայն այստեղ մեկ այլ շատ կարևոր հարց է առաջանում: Հայաստանից ելքն ինչպե՞ս պետք է տեղի ունենա: Ինչպե՞ս պետք է ՀՀ քաղաքացիները մեկնեն ու վերադառնան Հայաստան:
«Շատ երկրներ արդեն սահմանները բացում են և ունեն զբոսաշրջության վերսկսման իրենց ուղեցույցները, պրոտոկոլները: Օրինակ՝ Եգիպտոսն ընդունում է և՛ Հայաստանից, և՛ ԱՊՀ բոլոր երկրներից զբոսաշրջիկների:
Նույնիսկ թեստ չի պահանջում, ջերմաչափում անելով բավարարվում են: Բայց այստեղ նորից հարց է առաջանում՝ մեր ելքը ինչպե՞ս պետք է լինի, մենք ինչպե՞ս պետք է դուրս գանք: Վերադառնալիս ինչպե՞ս են մեզ ընդունելու: Բոլոր մանրամասները պետք է քննարկվեն: Ներգնա տուրիզմի մասով ևս պետք է քննարկենք: Դրսից զբոսաշրջիկը գա, ի՞նչ պայմաններով ենք ընդունելու, սահմանը հատելիս ինչպե՞ս պետք է լինի, հյուրանոցային տնտեսության օբյեկտներում ինչպե՞ս պետք է լինի, նրանց պահելը, պայմանները և այլն: Սրանք կարևորագույն կետեր են, որոնք շահագրգիռ կողմերի մասնակցությամբ մենք պետք է քննարկենք: Օր առաջ պետք է դա անել: Շատ երկրներ, որոնք բացում են սահմանը, արդեն մշակել են: Մենք կարող ենք այդ ամբողջ փորձը վերցնել, նայել, քննարկել, մեր առանձնահատկություններից ելնելով՝ որոշակի փոփոխություններ կատարել ու ուղեցույցները մշակել: Մեզ բացակա կդնեն, մենք չպետք է հապաղենք: Եթե շատ երկրներ արդեն հայտարարում են հուլիսի 1-ից սահմանները բացելու մասին, ապա եթե մենք հապաղենք ու հետ մնանք այդ երկրներից, համաշխարհային շուկայում մեզ բացակա կդնեն:
Հետո մենք կարող է որոշակի քայլեր արած լինենք, բայց արդեն մեզ բացակա դրած լինեն: Օր առաջ այդ քննարկումը պետք է կազմակերպել»,- ասաց Մեխակ Ապրեսյանը:
Տուրիստական ոլորտում հայտնի «Շելբի Տուր» ընկերության հիմնադիր Մարինա Ավետիսյանը «Առաջին լրատվական»-ի հետ զրույցում նշեց, որ տուրիստական ոլորտում այս պահին դեռ հստակություն չկա: Նրա խոսքերով՝ տարբեր երկրներ տարբեր չափորոշիչներ են դնում իրենց երկիր զբոսաշրջիկների ընդունման համար:
«Օրինակ՝ Եվրոպան իր սահմանները բացել է միայն եվրոպացիների համար: Սակայն այդտեղ ևս սահմանափակում կա, թե նայած որ եվրոպական երկրից ես գնում: Դուբայը հուլիսի 7-ից կբացի իր սահմանները զբոսաշրջիկների համար, բայց դեռ պարզ չէ՝ հայերի համար բաց կլինի՞, թե՞ ոչ: Մի շարք սահմանափակումներ կան, պարտադիր COVID թեստեր և այլն: Եգիպտոսը հուլիսի 1-ից բոլորի համար բացում է իր սահմանները, այդ թվում՝ Հայաստանի համար:
Տարբեր սահմանափակումներ կան: Տեղ կա՝ թեստավորումից հետո են թույլ տալիս, տեղ կա՝ ջերմաչափում անելուց հետո: Հայաստանը ջերմաչափումով երկրների թվում է: Գիտեք, այսպես ասեմ, ամեն ինչ շատ խառն է, հստակ չէ, ամեն երկիր իր ձևով է արձագանքում այս համավարակին: Օրինակ՝ Վրաստանը հայերին այս տարի չի ընդունի, Ռուսաստանը հուլիսի 15-ից սահմանները բացում է, բայց զբոսաշրջիկների համար նշում է օգոստոսի 1-ից: Դեռ հստակ չէ: Մի քիչ շուտ է հիմա խոսել այս մասին»,- ասաց Մարինա Ավետիսյանը:
Աղբյուր՝ 1in.am
