Սեպտեմբերի 21-ին դեսպանության և Էյնդհովենում ՀՀ պատվավոր հյուպատոս Վիլլի ֆան դե Կերկհոֆի նախաձեռնությամբ Նիդերլանդների ՏՏ կենտրոն համարվող Ֆելդհոֆեն քաղաքում տեղի է ունեցել ՀՀ Անկախության 30-ամյակին նվիրված հայաստանյան ներդրումային միջավայրի վերաբերյալ շնորհանդես, որն առցանց եղանակով իրականացրել է «Էնթերփրայզ Արմենիան»։
Միջոցառմանը բացման խոսքով հանդես են եկել դեսպան Տիգրան Բալայանը և պատվավոր Հյուպատոս Վիլլի ֆան դե Կերկհոֆը։
Տիգրան Բալայանը ներկաներին պատմել է անկախությունից ի վեր Հայաստանի երեսնամյա անցած ճանապարհի, ունեցած դժվարությունների, պետական կառավարման ոլորտում և տնտեսությունում իրականացվող ընթացիկ բարեփոխումների, հայ-նիդերլանդական դարավոր կապերի, ներկայիս փոխգործակցության և հեռանկարների մասին։
Այնուհետև «Էնթերփրայզ Արմենիայի» գործընկերները տեսակապի միջոցով հյուրերին են ներկայացրել Հայաստանի ընդհանուր ներդրումային միջավայրը, օրենսդրական դաշտը, Հայաստանի և Նիդերլանդների միջև երկկողմ տնտեսական հարաբերությունների ներկա մակարդակը, ՀՀ տարածքով ավելի մեծ շուկաներ մուտք գործելու հնարավորությունները։
Առցանց շնորհանդեսի ավարտին ներկաներին բաժանվել են նաև Հայաստանում տնտեսական գործունեության և ներդրումային հնարավորությունների վերաբերյալ տեղեկատվական նյութեր։
Միջոցառմանը ներկա էին Նիդերլանդների մեքենաշինական, բժշկական սարքավորումների արտադրության, տեղեկատվական տեխնոլոգիաների և գյուղատնտեսության ոլորտի առաջատար ընկերությունների ղեկավարներ և ներկայացուցիչներ, խորհրդարանի ներկա և նախկին պատգամավորներ, տեղական իշխանությունների ներկայացուցիչներ, գործարարներ, սպորտի ասպարեզում անվանի անձինք։
