ՀՀ տարածքային կառավարման և ենթակառուցվածքների նախարարի տեղակալներ Վաչե Տերտերյանը և Հակոբ Վարդանյանն երեկ ընդունել են Կարոլին Գեգինատի՝ Համաշխարհային բանկի հայաստանյան գրասենյակի ղեկավարի գլխավորած պատվիրակությանը։
Հանդիպման ընթացքում քննարկվել են 3 առանցքային հարցեր. գյուղատնտեսության ոլորտի՝ մասնավորապես՝ ոռոգման ջրի հասանելիության, էներգետիկ ոլորտում կատարելագործման և տարածքների համաչափ զարգացման վերաբերյալ։
Վաչե Տերտերյանը, ողջունելով հյուրերին, բարձր է գնահատել Համաշխարհային բանկի և Հայաստանի Հանրապետության միջև եղած սերտ համագործակցային կապերը՝ հավելելով, որ ինստիտուցիոնալ ու կառուցվածքային ոլորտներում բանկը լավագույն գործընկերներից է։
Հյուրերն առաջարկել են թվարկված ոլորտներում սեփական տեսլականները և ծրագրերը։ Հիմնվելով սեփական ուսումնասիրությունների վրա` ներկայացվել են ջրային ռեսուրսների կառավարման ոլորտում առկա խնդիրները և դրանց լուծումների ուղղությունները։
Էներգետիկայի ոլորտին վերաբերող ծրագրին անդրադառնալով՝ Հակոբ Վարդանյանը նշել է, որ գործուն քայլեր են իրականացվում նոր տեխնոլոգիաների ներդնման ուղղությամբ։ Հանդիպման ավարտին պայմանավորվածություններ են ձեռք բերվել նոր հանդիպումներ և քննարկումներ անցկացնելու վերաբերյալ։
