Առավոտյան Նոր Նորք վարչական շրջանի թաղապետարանի պատուհանների ուղղությամբ կրակոցներ են արձակվել: Այդ մասին լուրը 1lurer.am-ի հետ զրույցում հաստատեց ՆԳՆ հասարակայնության հետ կապի և լրատվության վարչության պետ Զարզանդ Գաբրիելյանը:
«Այս պահին դեպքի վայրում ենք: Հաղորդումն առավոտյան 8:54 է ստացվել, որ թաղապետարանի հետնամասի 2-դ հարկի պատուհանների վրա կրակել են: Հիմա օպերատիվ խումբը դեպքի վայրում է, կազմված փաստաթղթերն էլ փոխանցվել են Քննչական կոմիտե»,- ասաց նա:
Shamshyan.com-ի հաղորդմամբ՝ փետրվարի 20-ին արտակարգ դեպք է տեղի ունեցել Երևանում․ ժամը 09:00-ի սահմաններում ՀՀ ներքին գործերի նախարարության ոստիկանության Նոր Նորքի բաժնում օպերատիվ տեղեկություններ են ստացվել, որ Նոր Նորք վարչական շրջանի ղեկավարի աշխատակազմի վարչական շենքի պատուհանների ուղղությամբ կրակոցներ են արձակել:
Դեպքի վայր ժամանած ոստիկաններն ու պարեկները պարզել են, որ թաղապետարանի շենքի 2-րդ հարկի եվրոպատուհանների վրա կա կրակոցի մոտ 7 հետք: Ոստիկանությունը ձեռնարկում է անհրաժեշտ միջոցառումներ՝ դեպքի հանգամանքները, կրակողի ինքնությունը պարզելու, նրան և հանցագործության գործիք ատրճանակը հայտնաբերելու ուղղությամբ: Ոստիկանները թաղապետարանի բակում հայտնաբերել են «Նիսան» մակնիշի ավտոմեքենա, որի հետևի ապակու վրա նույնպես առկա է եղել կրակոցի հետք:
«Դեպքը գիշերն է եղել՝ կրակել են Նոր Նորք վարչական շրջանի շենքի պատուհաններին, չգիտեմ՝ ովքեր են եղել»:
Այս մասին «Հայկական ժամանակ»-ի հետ զրույցում ասաց Նոր Նորք վարչական շրջանի ղեկավար Տիգրան Տեր-Մարգարյանը՝ հաստատելով լուրերը, որ Նոր Նորք վարչական շրջանի ղեկավարի աշխատակազմի վարչական շենքի պատուհանների ուղղությամբ կրակոցներ են արձակել:
«Ով է արել, ինչ է արել՝ չգիտեմ, հենց հիմա տեղում աշխատում են ոստիկանները, Երևան քաղաքի քրեականի պետն է, Նոր Նորք վարչական շրջանի բաժնի պետը, օպերատիվ աշխատակիցները ճշտում են, կամերաներով փորձում են գտնել, թե ով է: Դեպքը եղել է մոտավորապես գիշերը 11-12-ի կողմերը»,- ասաց Մարգարյանը: Հարցին, թե որևէ վարկած ունի՞, պատասխանեց՝ ոչ, նույնն էլ ասել է ոստիկաններին: Նոր Նորք վարչական շրջանի ղեկավարը նաև նշեց, որ տուժողներ չկան միայն պատուհաններն են վնասվել:
