Վարշավայում՝ «Պատմության հետ հանդիպման տանը» (Dom spotkań z hisztorią) տեղի Է ունեցել լեհ ճանաչված ռազմական լրագրող, պատմաբան Վիտոլդ Ռեպետովիչի՝ Արցախյան 44-օրյա պատերազմի վավերագրությանը նվիրված «Պատերազմի մղձավանջը» վերտառությամբ լուսանկարների ցուցահանդեսի բացումը։

Միջոցառման ընթացքում մասնակիցներին ներկայացվել են հատվածներ ռեժիսոր Յադվիգա Նովակովսկայի «Պատերազմի և խաղաղության երկիր» վավերագրական ֆիլմից։

Միջոցառումը կազմակերպվել էր Լեհաստանում ՀՀ դեսպանության, Լեհ-հայկական հիմնադրամի և «Պատմության հետ հանդիպման տան» հաստատության համագործակցությամբ։ Միջոցառումը՝ նահատակված հայ հերոսների հիշատակին նվիրված աղոթքով է բացել լեհահայոց հոգևոր հովիվ Հայր Տարոն Վարդապետ Ղուլիկյանը։

Այնուհետև ներկաներին դիմել է Լեհաստանում Հայաստանի դեսպան Սամվել Մկրտչյանը։ Նա՝ ողջունելով ներկաներին, շնորհակալական խոսք է ուղղել Լեհ-հայկական հիմնադրամի նախագահ Արսեն Հովսեփյանին և «Պատմության հետ հանդիպման տան» հաստատության ղեկավարությանը։ Ս․ Մկրտչյանն անդրադարձել է 2020թ․ սեպտեմբերի 27-ից մինչև նոյեմբերի 9-ը Արցախի դեմ ադրբեջանաթուրքական հրահրմամբ 44-օրյա պատերազմի արհավիրքին։ Նա ընդգծել է, որ պատերազմը խաթարեց Արցախի ժողովրդի խաղաղ և ստեղծարար կյանքը և հանգեցրեց բազմահազար մարդկային կորուստների ու ահռելի նյութական վնասների։ Չնայած այդ ամենին, արցախահայությունը շարունակում է մնալ հաստատակամ՝ ապրելու և արարելու իր հայրենի հողի վրա։

Դեսպանը օրվա հրամայական է դիտարկել Ադրբեջանում՝ միջազգային մարդասիրական իրավունքի նորմերի կոպիտ խախտմամբ, պահվող հայ ռազմագերիների և քաղաքացիական անձնանց անհապաղ ազատ արձակումը և ադրբեջանական վերահսկողության տակ գտնվող տարածքներում հայ մշակութային ժառանգության պահպանությունը։ Այնուհետև դեսպան Սամվել Մկրտչյանը և Արսեն Հովսեփյանը ՀՀ կրթության, գիտության, մշակույթի և սպորտի նախարարության բարձրագույն պարգևը՝ Ոսկե մեդալը հանձնել են Յադվիգա Նովակովսկային՝ հայանպաստ գործունեության համար։