Ապրիլի 18ին, ժամը 20:00-ից մինչև 22:00, ՀՀ ԿԳՄՍՆ «Պահպանության ծառայություն» ՊՈԱԿ-ը՝ Հուշարձանների և տեսարժան վայրերի միջազգային օրվա առթիվ, Երևանի Հանրապետության հրապարակում՝ Հայաստանի ազգային պատկերասրաhի և Հայաստանի պատմության թանգարանի շենքի պատին կներկայացնի Հայաստանի հուշարձանների և տեսարժան վայրերի լուսապատկերային ցուցադրություն: Դա հիանալի հնարավորություն է ծանոթանալու մեր մշակութային ժառանգության գոհարներին։
Հայաստանի Հանրապետության Կրթության Գիտության Մշակույթի և Սպորտի Նախարարության "Պատմամշակութային արգելոց-թանգարանների և պատմական միջավայրի պահպանության ծառայություն" Պետական Ոչ Առևտրային Կազպակերպության տնօրեն Արա Թարվերդյանը ֆեյսբուքյան իր էջում գրում է.
"Հարգելի գործընկերներ,
Հուշարձանների և տեսարժան վայրերի միջազգային օրվա կապակցությամբ շնորհավորանքս եմ հղում բնագավառի բոլոր մասնագետներին, գիտնականներին և բոլոր այն մարդկանց՝ ովքեր իրենց կյանքում առանձնակի կարևորություն ու հոգատարություն են ցուցաբերում պատմամշակութային նյութական ժառանգությանը:
Մասնագիտական տոնի առթիվ շնորհավորանքի հետ մեկտեղ իմ շնորհակալությունն եմ հայտնում «Պատմամշակութային արգելոց թանգարանների և պատամական միջավայրի պահպանության ծառայություն» ՊՈԱԿ-ի մարզային ծառայությունների և արգելոցների անձնակազմերի բոլոր աշխատակիցներին՝ նվիրված և հոգատար աշխատանքի համար, ինչի ապացույցն է ոչ միայն նրանց ամենօրյա աշխատանքը, այլև պատերազմից հետո նրանց ջանքերով, Արցախից Հայաստան տարհանված պատմության «քարեղեն վկաները»:
Առանձնահատուկ գովասանքի և շնորհակալության են արժանի նաև բնագավառի այն մասնագետներն ու գիտնականները, ովքեր՝ համավարակով պայմանավորված, այցելուների համար իրական պայմաններում տեսարժան վայրերի անհասանելիությունը «հաղթահարեցին» վիրտուալ հարթակներում՝ առցանց էքսկուրսիաների և գիտաճանաչողական նյութերի տարածումով միջոցով:
Օգտվելով առիթից շնորհավորում եմ ՀՀ ԿԳՄՍ նախարարության, մեր գործընկեր կազմակերպությունների, թանգարանների աշխատակիցներին և ղեկավար անձնակազմերին, մաղթելով բեղմնավոր աշխատանք և հարատև խաղաղություն:
Հարգանքով՝ Արա Թարվերդյան":
