Ռուսական խաղաղապահ զորախմբի պատասխանատվության գոտում նախորդ շաբաթ արձանագրվել է հրադադարի ռեժիմի մեկ խախտում: 

Ասկերանի շրջանում արձանագրվել է հրադադարի ռեժիմի խախտում: Ըստ ՌԴ ՊՆ հաղորդագրության՝ նոյեմբերի 5-ին, տեղի ժամանակով ժամը 12.30-ին, ադրբեջանական դիրքերից հրաձգային զինատեսակներից կրակ է բացվել Խրամորթից 1,8 կմ դեպի արևելք գյուղատնտեսական տեխնիկայի օգտագործմամբ հողագործական աշխատանքներ իրականացնող տեղի բնակչի ուղղությամբ:

Հրետակոծության հետևանքով տեխնիկան աննշան վնասվածքներ է ստացել, տեղի բնակիչը չի տուժել: ՌԴ ՊՆ-ից հայտնում են, որ փաստի առթիվ ռուսական խաղաղապահ զորախմբի հրամանատարությունն ադրբեջանական կողմի հետ համատեղ քննություն է իրականացնում։

Հիշեցնենք, որ նոյեմբերի 5-ին Արցախի Հանրապետության ոստիկանության Ասկերանի շրջանային բաժնում տեղեկություն էր ստացվել, որ ժամը 12:30-ի սահմաններում, Ստեփանակերտ քաղաքի բնակիչ Կ. Մարտիրոսյանը (ծնված 1969թ.) «Բելառուս» մակնիշի տրակտորով Խրամորթ գյուղի վարչական տարածքում Մ.Առաքելյանին պատկանող «100 հեկտար» կոչվող տարածքում աշխատանքներ իրականացնելիս, հարակից ադրբեջանական մարտական դիրքից` նրանց ուղությամբ հրաձգային զինատեսակներից կրակ են բացել։

Արձակված կրակոցներից ջարդվել էր տրակտորի դիմապակին և ղեկակառավարման սարքերի վահանակը։